A Axencia Estatal de Investigación lanza un novo calendario de convocatorias con información clara, estruturada e actualizada sobre as principais axudas previstas para a segunda metade de 2025.
Este calendario permite informar á comunidade científico-técnica sobre a planificación das convocatorias que están actualmente en curso ou cuxa apertura está prevista proximamente.

Na planificación das axudas inclúense os investimentos que realizará a Axencia Estatal de Investigación (AEI) con fondos dos Orzamentos Xerais do Estado (OXE), do Fondo Europeo de Desenvolvemento Rexional (FEDER) e do Fondo Social Europeo (FSE) para financiar e cofinanciar as convocatorias que se xestionan.

Principais novidades:
• Este novo calendario recolle todas as convocatorias previstas desde xullo de 2025 ata final de ano, ademais de incorporar as actualizacións das axudas que se atopan actualmente en tramitación.
• O calendario indica as datas exactas de apertura de cada convocatoria.
• Cada convocatoria incluída no calendario conta cunha ligazón directa a toda a información relacionada coa axuda, o que permite acceder de forma sinxela e centralizada a todos os detalles desde un único punto de información.

Modificación de datas nas convocatorias de Proxectos de Xeración de Coñecemento 2025, Axudas Ramón y Cajal 2025 e Juan de la Cierva 2025
Un aspecto a ter en conta pola comunidade científica interesada nas convocatorias de Proxectos de Xeración de Coñecemento 2025, Axudas Ramón y Cajal 2025 e Juan de la Cierva 2025 é que este ano adiántase a apertura do prazo de solicitude a novembro, no canto de decembro, como era habitual en anos anteriores.